سرحان

(كتبت هذه التدوينة في احد الايام الشديدة الحرارة)..يقولون ان الانسان يتأثر بطقس ميلاده فمواليد الصيف يختلفون عن مواليد الشتاء ومواليد اول الشتاء يختلفون عن مواليد اخر الشتاء وهكذا لذلك منهم من يفضل الشتاء ومنهم من يفضل الصيف وانا من النوع الاول الشتوي مواليد شهر فبراير(شهر الناس الطيبين) لذلك افضل الشتاء دون جميع الفصول الاخري حتي فصل الربيع ليس بروعة الشتاء ربما الطبيعة فيه اجمل والاشجار ترتدي فيه اجمل زينتها والورود تبدو اكثر اثارة ونضرة لكن الناس في الشتاء اجمل واشيك نعم احب الورد لكني احب الناس اكثر وافضل الشتاء ايضا ربما لانه يشبهني واشبهه كثيرا في هدوءه في رومانسيته واحيانا بروده وبالطبع هناك الكثير من يوافقني الرأي من الكائنات الشتوية.. لكن في مثل هذا اليوم الحار الذي يشعل رأسي وجسدي لدرجة تدفعني الي الرقض الي نهر النيل والقاء نفسي هروبا من حرارته ولكني اتمالك نفسي واقنعها بالتفكير في حل اخر اقل جنونا لهذه المشكلة التي ادت الي تعطل جميع حواسي وتفكيري الذين يرفضون العمل في مثل هذه الحرارة فيهديني الجزء الضئيل المتبقي من عقلي الي احضار بخاخة المياه ورش السرير بأكمله بالماء وزيادة سرعة المروحة لاقصي سرعة واستلقي علي السرير متخذا من ملابسي ماقل وستر وحينها فقط اشعر بنشوة انتصاري علي الحر وابدأ في ممارسة هوايتي المفضلة وهي السرحان, انظر الي سقف الحجرة وابدأ في استراجع الذكريات الصيفية ولطالما ارتبط الصيف بالاجازة واجازاتي توقفت بعد الصف الثالث الاعدادي لم تعد كاسابقاتها من الاجازات التي التي كانت بطعم الايس كريم والوليتا ومشاجراتي مع اخوتي علي الاتاري الفاميلي مجلة ماجد وسرحان الكسلان وامونة المزيونة ..مباريات الشارع الحامية مع اصدقائي جيراني اظل اتذكر واتذكر لايقطع سرحاني سوي صوت امي ..احمااااااااد انزل ذاكر..اروح اذاكر وابقي اكمل لكم بعدين السرحان جاي كتييييير..

1. اللي بيحب مصر يصلي ع النبي ..بعد كدا يعمل اللي هاقوله عليه بالملي مش نص ملي ها مركزين معايا ..اول حاجة تدخل علي الموقع دا https://www.taghyeer.net/ تملي بيان الموافقة حاجة سهلة جدا لا هاقولك زعق وقول مصراوي ولا اقلع هدومك فالشارع واطنط واعمل شامبانزي بيطنط فالجبلاية وفوق العربيات بتاعة الناس اللي بتكره ماتشات مصر بسبب اللي بيحصل فعربياتها ولا اسرق الوان اختك اللي ففنون كويسة علشان تلخبط وشك بعلم مصر قال وطني الواد يعني..لان مصر بجد محتاجة شبابها في الايام المهمة جدا اللي جاية لان هايتحدد فيها مصير جيل بحاله..تاني حاجة تروح علي اقرب مركز شرطة جمب بيتك لالالالالالالا ماتخفش ماتسلمش نفسك ولا حاجة روح طلع بطاقة انتخابية علشان تضمن حقك فان علي الاقل صوتك مايطلطش من بتوع الحزب اللي مش وطني لحساب نصابينهم يوووه قصدي مرشحينهم وعلي فكرة دلوقتي استخاراج البطاقة بقي طول السنة مش فشهر يناير بس..شوف الخباثة واللؤم بتاع اللي مايتسموش عاملين التسجيل شهر واحد بس علشان مش كتير اللي يطلع بطاقة ماهو اكيد من مصلحتهم دا علشان يقدروا يزوروا براحتهم تصدقوا دا الميتين بيدوا صوتهم للحزب الوطني..والله خالي مات وصوتوا فضل موجود عشرين سنة فجدول الانتخابات..واللي يقولك خلص وقت التسجيل قولوا انا تبع عمك وسيدك البرادعي ولما تتاخد من قفاك ماتخفش ولا تتهز ابعتلي بلييز كول مي بس وماتكلفش نفسك بهزر ياعم ماحدش هايقدر يكلمك ولا يجي عندك والمصري اللي علي حق يقول للحزب الوطني لالالالالالالا

أهلا..وسهلا..هالو افري بادي

من اولها كدا علشان نبقي علي نور وكمان علشان نسكت الناس الفتايين واللي مالهومش فيها والرغايين وباقي عاهات اعلانات كوكاكولا انا عامل المدونة دي علشان اكب فيها اللي في دماغي.اه اكب مش عاجبك؟ ..كل اللي فبالي ومش لاقي حتة ارميه فيها هارميه هنا فيا قارئ خطي استحمل عتهي و ماتنتظرش اسلوب ادبي راقي ولابلاغة لانا عبد الحي سلامة ولاانا سيد درويس بس اوعدكم في المجمل بحاجة مفيدة لاني بقدر وقتكم الفاضي حتي وان كان فاضي مش هاخليك تضيعه معايا فحاجة تافهة بس خد فكرة واقري بكرة او بعد بكرة او السنة الجاية زي ماتحب يعني او استني الاوكازيون بنزل مواضيع بسعر الجملة وطبعا اول ناس هاتقري الكلام دا ناس قارياه بالاكراه فبشكركم انكم اهتميتم باللينك بتاع المدونة وفتحتوها..دانا اقطعكم لو ماقريتوش..هههه ومستني تشجيعكم ليا واستحملوا اسلوبي فالكتابة لانه اكيد مش هايبقي علي مستوي عالي في التعبير او ترتيب الافكار..وشكرا وابقوا اقروني بالسنة مرة حرام تنسوني بالمرة..